Kryetari i Komunitetit Mysliman të Shqipërisë, H. Bujar Spahiu, priti, sot, në një takim një grup nxënësish nga Medreseja e Tiranës, të shoqëruar nga drejtori i shkollës, z. Ndriçim Gjimi.
Gjatë takimit, Kryetari Spahiu, inkurajoi nxënësit e medresesë për rëndësinë e dijes, harmonizimin e shkëlqyer që medreseja bën midis shkencave ekzakte, shoqërore dhe ato fetare.
“Të qenit nxënës medreseje duhet ta shihni si privilegj, duhet të vlerësoni sakrificën e prindërve tuaj. Shijen e plotë të të qenit ish-nxënës medreseje do ta ndieni edhe më shumë më vonë, kur ju të dilni ne jetë dhe ta shihni këtë periudhë nga një distancë tjetër kohe.” – tha ndër të tjera Kryetari Spahiu gjatë bashkëbisedimit me nxënësit.
Ndërsa Drejtori i Medresesë, z. Gjimi, bëri një përmbledhje të procesit edukativ që zhvillohet aktualisht në medresenë e Tiranës, duke vënë theksin mbi arritjet e nxënësve në olimpiada të ndryshme që zhvillohen brenda dhe jashtë vendit.
Në përfundim të takimit, Drejtori Gjimi, i dhuroi Kryetarit Spahiu një dhuratë simbolike në emër të institucionit që ai drejton.
