Kryetari i Komunitetit Mysliman të Shqipërisë z. Skender Bruçaj, ka zhvilluar dje një sërë vizitash në myftinitë e rretheve Gjirokastër, Delvinë dhe Sarandë.
Gjatë vizitës në Gjirokastër Kreu i KMSH-së është takuar më myftiun z. Armand Islami, ku kanë diskutuar rreth problematikave të ndryshme, mbi mbarëvajtjen e punëve në këtë myftini, si dhe realizimin e disa projekteve për restaurimin godinës se ish medresesë, rregullimin dhe restaurimet e dyqaneve vakëf në zonën e pazarit, etj.
Kryetari Bruçaj ka vizituar dhe parë nga afër gjendjen e disa xhamive dhe vakëfeve të cilat kanë probleme pronësie dhe kanë degraduar si pasojë e mungesës së ndërhyrjeve restauruese, si xhamia e Dunavatit të Sipërm dhe xhamia e Meçitës.
Vizita në qytetin e Gjirkastrës është mbyllur me një takim pune me imamët e qytetit dhe të zonave përreth.
Ndërsa në Delvinë, gjatë takimit me Myftiun, z. Bledar Ali dhe imamët e këtij qyteti, Kryetari H. Skender Bruçaj, është njohur me aktivitetet e fundit të myftinisë si dhe ka vizituar një pjesë të vakëfeve që Komuniteti Mysliman ka dhe administron në këtë rrreth, si kompleksin e rrallë kulturor islamik të Xhermëhallës dhe kompleksin e xhamisë së Gjinaleksit.
Në xhaminë e Gjinaleksit, Kryetari është njohur nga afër me ecurinë e punimeve për restaurimin e saj nga përgjegjësi i punimeve për restaurimin z. Enver Samuri.
Aktualisht në këtë xhami po bëhet zbritja e çatisë, nga ku ka ardhur edhe problemi kryesor i hyrjes së ujrave, po bëhet sistemimi i inerteve të mbledhura gjatë shekujve rreth xhamisë dhe sistemi drenazhimit.
Ky projekt, i cili synon restaurimin e parë të plotë të kësaj xhamie po financohet nga Komuniteti Mysliman dhe punimet pritet të zgjasin rreth shtatë muaj.
Ndërkohë edhe në Sarandë z. Bruçaj është takuar me myftiun e zonës, z. Bledar Mullaj dhe me imamët e këtij qyteti, ku kanë folur rreth problematikave të ndryshme. Ai është njohur nga afër me gjendjen e xhamive dhe është interesur për vënien në efiçencë të pronave vakëf të qytetit jugor.
Në këto vizita Kryetari Bruçaj shoqërohej nga Drejtori i Marrëdhënieve me Publikun dhe Median z. Agron Hoxha, Drejtori i Burimeve Njerëzore z. Uran Kalej dhe Përgjegjësi i Departamentit të Shkencave Islame në Universitetin Bedër z. Genti Kruja.
12 prill 2017
