Është inauguruar Xhamia e re në Sauk.
Në inaugurimin e saj morën pjesë nënkryetari i Komunitetit Mysliman të Shqipërisë, z. Bujar Spahiu, myftiu i Tiranës, z. Ylli Gurra, donatorët, përfaqësues të shoqatave kontribuese, përfaqësues të ambasadës së Katarit në Shqipëri, imamë të xhamive të Tiranës, si dhe dhjetëra besimtarë të zonës.
Ceremonia u hap me këndim Kur’ani nga imami i xhamisë, Hafiz Nazmi Kurti.
Nënkryetari i Komunitetit Mysliman z. Bujar Spahiu, i pranishëm në ceremoninë e inaugurimit falënderoi donatorët për ndërtimin e kësaj vepre të bukur.
“Kam kënaqësinë të jem në këtë inaugurim të kësaj xhamie. Shpreh nderin dhe mirënjohjen për donatorët shqiptarë dhe të huaj si dhe shoqatat të cilat kontribuan për ndërtimin e këtij objekti kulti. Xhamitë janë vende ku bashkohemi dhe shprehim dashurinë ndaj Allahut të Madhëruar, formohen dhe edukohen breza të cilët do i shërbëjnë më së mirë kombit dhe shoqërisë sonë”, tha z. Spahiu.
Gjithashtu në këtë aktivitet mori pjesë edhe myftiu i Tiranës, Ylli Gurra, i cili shprehu mirënjohjen për kontribuuesit dhe theksoi se xhamitë janë vatra ku formohen qytetarë dhe individë me vlerë për shoqërinë.
Gjatë ceremonisë përshëndetën edhe donatorët, përfaqësues të ambasadës së Kuvajtit, dhe përfaqësues të shoqatavetë cilët theksuan rëndësinë e xhamive në ndërtimin e jetës shpirtërore të banorëve të zonës.
Kjo xhami është ndërtuar nga kontributi i donatorëve kuvajtjan, z. Bedri Xhebrahimit, besimtarëve të zonës, shoqatës “Mirësia” dhe shoqatës “Rahma International”.
Pas inaugurimit u krye edhe falja e namazit të drekës.
29.09.2016
