Instituti i Studimeve Islame “Hafiz Sabri Koçi”, organ i Komunitetit Mysliman të Shqipërisë, hapi këtë të shtunë vitin e ri të programit njëvjeçar të njohurive bazë fetare për vitin akademik 2024-2025. Ky është viti i katërt i organizimit të këtij programi, i cili ka tërhequr rreth 35 studentë, femra dhe meshkuj (15 – 45 vjeç) nga qytete të ndryshme të Shqipërisë.
Në ditën e parë të programit, Kryetari i KMSH-së, H. Bujar Spahiu, përshëndeti studentët, duke i uruar suksese dhe duke theksuar rëndësinë e këtij programi në pajisjen e tyre me njohuri të vlefshme fetare. Ai vuri theksin tek roli i këtyre njohurive si një bazë e fortë për të kuptuar më mirë fenë islame dhe traditat e saj.
Nënkryetari i KMSH-së, z. Taulant Bica, i informoi studentët mbi strukturën e leksioneve, të cilat do të zhvillohen në formë të alternuar, si në mënyrë fizike ashtu edhe online, duke ofruar fleksibilitet dhe lehtësim për studentët që vijnë nga zona të ndryshme të vendit.
Gjithashtu, studentët u përshëndetën nga Dr. Xhemal Saferti, përgjegjës i Departamentit të Shkencave Islame në Kolegjin Universitar Bedër. Ai nënvizoi rëndësinë e këtij programi për formimin fetar dhe intelektual të studentëve që ndjekin këtë kurs.
Programi përfshin një seri lëndësh të rëndësishme si: Kur’an, Hadith, Tefsir, Fikh, Hitabet, Morali Islam, Akide dhe Histori Islame. Lëndët do të jepen nga pedagogët e Departamentit të Shkencave Islame dhe disa myftinj.
Në përfundim të këtij programi, studentët do të pajisen me një certifikatë për arritjet e tyre në lëndët fetare, duke marrë një bazë të fortë të njohurive për të ardhmen e tyre fetare dhe intelektuale.
