Në një ceremoni festive të organizuar në Amfiteatrin e Liqenit Artificial, 233 studentët e brezit të 11-të përfunduan me sukses rrugëtimin e tyre akademik duke u diplomuar në 11 programe bachelor & profesionale dhe 8 programe master.
Në fjalën e tij përshëndetëse kryetari i Komunitetit Mysliman të Shqipërisë, H. Bujar Spahiu vlerësoi kontributin dinjitoz të Bedër në arsimimin dhe edukimin e brezave.
Rektori i universitetit, Prof. Gjergj Sinani, falënderoi studentët që zgjodhën Kolegjin Universitar Bedër për formimin e tyre profesional. i përgëzuar për arritjet dhe i uroi suksese të mëtejshme.
Kryetari i Bordit të Administrimit në Bedër, Dr. Ali Zaimi i përshëndeti të pranishmit dhe i uroi arritje të vazhdueshme të diplomuarve. Ai falenderoi veçanërisht prindërit dhe familjarët për kontributin e tyre të jashtëzakonshëm.
I ftuar nderi ishte Kryetari i Organizatës “Educators Without Borders International”, Dr. Mohamed Alobeidli dhe z. Zayed Almansoori, anëtar i EWBI Alumni Association.
Almansoori mbajti fjalën e rastit dhe ndau shkurtimisht rrugëtimin e tij akademik me studentët tanë, të cilët i nxiti të kontribuojnë profesionalisht në komunitet në të ardhmen.
Ceremonia vazhdoi me shpërndarjen e certifikatave të ekselencës për studentët me mesataren më të lartë në çdo program studimi. Dr. Alobeidli i shpërndau certifikatat ekselentëve të vitit 2024.
Më tej, studentët e secilit program u ngjitën në skenë për t’u pajisur me certifikata dhe për të shkrepur fotot e rastit me njëri-tjetrin dhe me stafin akademik.
Në përfundim të ceremonisë, të gjithë studentët u ngjitën në skenë për të hedhur kapelet e diplomimit, duke mbyllur kështu një cikël mjaft të rëndësishëm në jetën e tyre profesionale.
I urojmë suksese të mëtejshme të diplomuarve tanë!
