Në xhaminë e Fushë-Krujës, u zhvillua mbrëmë programi: “Të njohim Profetin Muhamed (a.s)”, ku ligjëruan nënkryetari i KMSH-së z. Gazmend Aga, Myftiu i Krujës, z. Erjol Haxhiu, imamët Muharrem Vrana dhe Besmir Kruta.
Në fjalën e tij nënkryetari i Komunitetit Mysliman u shpreh se duke parë situatën në të cilën ndodhet njërëzimi sot, duke parë plagët e shoqërisë së sotme, njeriu ndihet i obliguar që t’i rikthehet shembullit të Profetit Muhamed a.s.
“Çdo profet me ardhjen e tij i solli zgjidhje problemeve të kohës, shërim plagëve të shoqërisë, po të mbledhim të gjithë pofetësitë e profetëve deri të Profeti Muhamed a.s., do të vëmë re sa ato i kanë dhënë një zgjidhje të qartë dhe përfundimtare problemeve që ka patur njerëzimi në atë kohë.
Me ardhjen e Profetit Muhamed a.s., ai u mundua t’i jepte një zgjidhje problemeve që kishte shoqëria në atë kohë dhe problemeve që do të kishte aty e tutje dhe ja ku jemi sot në shekullin 21 , ne si shoqëri shqiptare të ndikuar edhe nga problemet globale, hasim nga problemet më të ndryshme, që s’po mundim t’i zgjidhim si familje, si shoqëri e as si shtet dhe pikërisht këtu është roli i besimtarit dhe zgjidhja që duhet të sjellë me shembullin e tij.”, tha z. Aga.
Më tej në prgramin e organizuar nga Myftinia e Krujës, nënkryetari Aga nënvizoi faktin se të jesh besimtar është edhe një përgjegjësi e madhe dhe një besimtar i mirë i shërben shoqërisë, vendit apo komunitetit në të cilin jeton.
20 dhjetor 2016
